Home About

Te āwhina i te rangahau mātauranga ki te whakamana i ā tātou ākonga katoa

Māori symbol representing togetherness. Bringing together all of our understanding to empower all of our learners. 

Tēnei mātou te pōwhiri atu nei i a koe kia āwhina i ngā mahi panoni i te rangahau me te aromātai i te mātauranga hei whakamana i ngā ākonga katoa puta noa i Aotearoa. E mea ana mātou mā te whakarite matakitetanga kawe tahi, me te huihui hoki i ō tātou mōhiotanga, ka pai ake ngā huaputa o te rangahau me te aromātainga mātauranga mā te katoa, tae atu ki ngā ākonga, ki ngā kaiako, ki ngā tumuaki, ki ngā kairangahau, ki ngā whānau me ngā hapori.

He whāinga wāhi tino nui

He tino wā whakahihiko wairua tēnei mō te hunga whai wāhi mai. Kei te tīmatanga koe o tētahi hīkoi 10-tau te roa, tērā pea ka rerekē i roto i ngā tau, hei whakatutuki i ngā hiahia hou, hei whakauru hoki i ngā whakaaro me ngā auahatanga hou.

Tō mātou Kaupapa

He mea pou tā mātou kaupapa ki runga i ngā mātāpono o Te Tiriti o Waitangi, ā, he mea arataki hoki e Te Tāhuhu o Te Mātauranga, e Te Tari Arotake Mātauranga me Rangahau Aotearoa. Kei te whakawhanaketia e mātou tētahi rautaki ā-motu mō te rangahau me te aromātai, hei tautoko i ngā huaputa ako pai ake mā ngā tāngata katoa o Aotearoa.

Mā tēnei rautaki e:

  • Tautohu ngā mahi matua mō ā mātou kawenga pīkau taumaha
  • Whakapakari i ō mātou kōtuitanga/hononga, me ngā māramatanga ka hua ake
  • Whakapiki i te whāinga take o te taunakitanga, hei whakatinana huaputa akoranga pai ake mā te katoa.

Mahi tahi hei whakapakari i ā mātou mahi, me tā mātou pānga ki ngā ākonga, otirā mā te pūnaha mātauranga.

Mā te mahi katoa, ka taea e tātou te arotahi ki ngā ara e puta ai he hua ōkiko

  • He whānau koutou, ā, kei te hiahia koutou kia puta ake ngā tino hua ka taea mā ā koutou tamariki, kia mārama hoki ki ngā āhuatanga ka whai hua, he aha hoki i whai hua ai. Tiria mai ki a mātou he aha ngā mahi matua hei rangahau.
  • Mehemea he ākonga koe o nāianei, o mua rānei, kua noho mōhio koe ki tō tātou pūnaha mātauranga.  Mā te tiri mai i ō whakaaro, kitenga hoki mō ngā mahi whai hua, ngā mea hua-kore hoki, ka tika ake te ahunga o te waka, waihoki ngā whakaaro o ō hoa ākonga, me tō whānau, mō tō rātou ara i te ao mātauranga. He aha ngā mahi matua ki a koe?
  • Hei kaiako, ko tāu mahi he huritao i te pānga o ō mahi whakaako mō ngā huaputa o ō ākonga. Kei te mōhio koe ki ngā wāhanga e tika ana kia kaha ake te arataki, te tautoko rānei i a koe, ā, kei te whakaae koe he hua nui tō te mahi i takea mai i ngā taunakitanga, me ngā ritenga mahi i runga i te mōhio. He aha ngā mahi matua ki a koe?
  • He tumuaki koe, he manutaki, he tūranga whakahaere mātāmua kē atu rānei tōu, nā reira he tūranga pai ēnei hei whakarewa i ngā tūhuratanga pāhekoheko, me ngā hātepe, i waenga i ō hoa mahi. He aha ngā mahi matua ki a koe?
  • He kairangahau koe, nā reira kei te kohikohi pea koe i ētahi taunakitanga kounga tiketike me ngā māramatanga i te taha, tērā pea ka taea te tiri, te paihere whānui hoki ki roto i ngā ritenga mahi o ia rā.  He aha ngā mahi matua ki a koe?

Piri mai ki tā mātou kōrero

He mea hira ō whakaaro. He mea hira ō wheako me tō māramatanga. Māu e āwhina mai, e tino taea ai e tātou tahi te whakaraupapa ko ēhea ngā rangahau me ngā aromātai mātauranga tino taketake, me te tautoko i ngā kairangahau me ngā kaiaromātai kia hāpainga te kaupapa.

Kei a koe te tikanga o te roa, o te poto rānei o ō kōrero - whakautua ētahi pātai, me whakamārama i tāu i kite ai, me ruku rānei ki te hōhonutanga o te kaupapa. Ka riro māu e whiriwhiri ki te urutomo mai, ā, he mea hira te rongo i tōu reo.

Tēnā whakakīa te rangahau i konei. (Anei te hononga)

Kei te wātea te toronga whakaaro taea noatia te 24 o Hune/Pīpiri 2022.

Kia ako koe i ētahi atu kōrero mō tā mātou hīkoi, tirohia te pukapuka whakawhiti kōrero ki konei [PDF, 7MB].

Ka āhei hoki koe te tuku īmēra ki a mātou ki e.red@education.govt.nz

Te Tūmataititanga

He kaitiaki mātou o ngā kōrero whaiaro mō ngā whānau me ngā ākonga, nā reira e ū ana Te Tāhuhu o Te Mātauranga ki te āta tiaki, me te whakamahinga tika o ngā kōrero whaiaro katoa ka kohia e ia, ka puritia, ka whakamahia, ka tiria hoki e ia. Ko ngā pārongo mōu ka pupuritia i runga anō i te Ture Tūmataititanga 2020 (the Privacy Act 2020).

Ina tuku mai koe i tētahi tāpaetanga mā te whakamahi i te hātepe tāpae tuihono, ka noho ingoa-kore tō tāpaetanga.  Ahakoa tērā, kia mārama koe, kei roto pea i tō tāpaetanga ētahi kōrero e taea ai koe, te tangata kē rānei te tautohu. Mehemea he pērā, ka whakahaeretia ngā mōhiotanga i tō tāpaetanga  e Te Tāhuhu, i runga anō i te Ture Tūmataititanga 2020 (the Privacy Act 2020).

Hei wāhi o te hātepe torotoro whakaaro nei, ka āhei koe te homai i tō tāpaetanga mā te wāhitau īmēra kua oti te whakarārangi i tēnei whārangi. Kia mōhio koe, ki te kōwhiri koe kia homai i ētahi tāpaetanga tuhituhi, ataata, ororongo hoki mā te wāhitau īmēra, e kore e taea e te Tāhuhu te kī taurangi ka noho haumaru tō tāpaetanga īmēra, ōna tāpiritanga rānei, i te tukunga mai o tō īmēra. Ka noho haumaru tō īmēra me ōna tāpiritanga katoa ina uru mai ki te Tāhuhu.  Mehemea he āwangawanga ōu mō te tūmataitinga me te haumarutanga o tō tāpaetanga, ko te manako a te Tāhuhu kia whakamahi koe i te puka tāpaetanga tuihono (ā-ipurangi). 

I ētahi wā ruarua noa iho, ka taea pea e mātou te tāpae ara anō mō ngā tāpaetanga ā-waha. Tēnā tukua mai he īmēra ki e.red@education.govt.nz hei tono i tēnei ara.